فیس بک کا اب تک سب سے منفرد فیچر متعارف

فیس بک اس وقت انٹرنیٹ پر سب سے زیادہ وقت لینے والی سائٹ ہے جہاں ہر ایک ہی گھنٹوں مگن رہتا ہے مگر اب اس نے دفتری ملازمین کو اپنا پورا وقت سماجی رابطے کی اس ویب سائٹ پر گزارنے کے لیے ایک نیا فیچر متعارف کرادیا ہے۔

یہ ہے فیس بک ایٹ ورک یعنی دفتری فیس بک جو بنیادی طور پر کاروباری اداروں کے لیے اپنا فیس بک جیسا سوشل نیٹ ورک قائم کرنے کے لیے متعارف کرایا گیا ہے۔

اس میں تمام فیچرز جیسے نیوز فیڈ، تصاویر و دیگر فیس بک جیسے ہی ہیں تاہم اس کا رنگ نیلے کی بجائے سفید ہوگا اور سب سے اہم بات یہ ہے کہ اس میں وقت گزاری کے دوران اگر باس دیکھ بھی لے گا تو اسے دفتری امور کا ہی حصہ سمجھے گا۔

فیس بک کا کہنا ہے کہ کچھ کاروباری اداروں کے لیے موبائل فون اپلیکشن کے ذریعے متعارف کرایا گیا ہے تاہم بہت جلد اس کا ڈیسک ٹاپ ورژن بھی پیش کردیا جائے گا۔

فیس بک کا کہنا ہے کہ فیس بک ایٹ ورک کے فیچر کے ذریعے لوگوں کا دفتری کام زیادہ موثر طریقے سے ہوسکے گا اور اسے فیس بک کے ملازمین کافی عرصے سے استعمال کررہے ہیں تاہم اب ہم اسے پوری دنیا کو پیش کرنا چاہتے ہیں۔

افادیت اور دفتر میں فیس بک پر وقت گزارنا چاہے متضاد الفاظ لگیں مگر سماجی رابطے کی ویب سائٹ کے خیال میں یہ دفاتر میں بہت زیادہ کامیاب فیچر ثابت ہوگا اور ملازمین کو اپنی فیس بک ونڈو بار بار چھپانی نہیں پڑے گی۔